|
|
あまみ庵の店主：森本が雑誌や新聞に書いた文章を掲載します。 |
沖縄タイムス
＜２００１年１０月３日 朝刊 １面＞
残さびらな・島くとぅば（３８）
拝みんしょうらん。
わんやぁ うーしま（大島）ぬぅなじぇ（名瀬）なんてぃ古本屋ばぁあきねぇしゅんむん者だりょん、
奄美らがいじゃ（出）しゅん本やぁ 年間おおかた（はちじっさち）八十冊。なは（沖縄）なんてぃや うりぬ四百さち（冊）ぶぇーりち 聞きょうたんじゃが、奄美やぁ なは（沖縄）ぬ一割がちぬけぶり（人家）どぅありょんかなぁ、ちゅう（人）割りすぃりば なは（沖縄）ぬ倍ぬ本ば いじゃ（出）しゅん、うとぅまらさんとろだりょっとぉ。
わんわー（若）さんとぅき（時）やぁ、大和だかアジアだか あまくまあ（歩）っちをぅりょうたんばぁ、もかし（昔）、ソ連むんぬ アフガンなんてぃ いくさ（戰）しゅんくる、インドらが シマがり むどぅ（戻）ぅてぃきょうたぁ。ふぇっさむん、なぁ二十年めー（前）だりょっか。……なまやアメリカむんぬ……。いくさ（戰）ちゅんやぁ はごぉさむんだりょんやぁ。たんたむぃがんぬ、いちでんだぁでんむん（物）ならんさばくりぶぇ〜り。
奄美なんてぃあたん ふぅ（大）さんいくさ（戦）ちばぁ、ぬーちいしゃんちぃ 一六〇九年ぬ やまとぅ（薩摩軍）とぅぬ いくさ（戦）だりょうろぅ。大和ぬ ハイテクてぃっぽう（鉄砲）なん も（向）けぃてぃ、大島とぅ徳之島ぬ シマんちゅきゃやぁ、あらじばて（焼畑）ぬ おおがい（粟粥）たぎらし、のれぐち（呪口）入りてぃ とら（闘）ようたんちっかなぁ。うんきもがなしゃんいくさ（戦）らが四百年、奄美やぁ なまだか鹿児島県民だりょっか。
うがしあんば、トカラぬ子宝島らがくまなんてぃやぁ、あんかり「うるま」（うる（珊瑚）ぬ島）なとぅりょんどぉ。わんやぁ、うーしま（奄美）とぅなは（沖縄）やぁ 「琉球弧」・「ヤポネシア」ちゅん まっくりかたよんまぁ、「うるまんちゅ人」ちど うむ（思）とぅりょうり。わんしまよもた（言葉）やぁ、なぁうんぶんだりょっか。とーとがなしありょうたぁ。
|
|